愛情中相信好多人都感受過冇安全感嘅感覺。可能好多人會透過偷睇對方電話、check行蹤等等嘅方法希望去揾返安全感，但反而更容易令對方不滿而破壞感情。或者可以試吓唔好再懷疑對方，而透過以下4個方法由自己開始做起！

1）揾出冇安全感嘅原因

當你覺得冇安全感嘅時候，首先應該思考吓點解自己有咁嘅感覺。其實人好多時都鍾意自己胡思亂想，所以要搞清楚會唔會係自己杞人憂天，定對方真係做咗啲嘢令你有咁嘅感覺！

2）對自己有自信啲

與其成日好擔心對方會遇到一個比自己好嘅人，不如學識對自己有自信啲！可能你自己亦有唔少優點，只係你未發現呢～又或者由今日開始增值多啲自己，令自己成為更好嘅人！

3）同對方坦白講出自己嘅感受

好多人覺得不安嘅時候都往往會自己猜忌好多嘢，而令對方一頭霧水、無所適從。所以其實最直接嘅方法就係坦誠講出自己嘅感受，俾對方知道你諗緊啲咩、避免不必要嘅誤會同爭執。

4）享受獨處嘅時間

唔少人拍拖可能由本身好sweet嘅依賴變成過分依賴。每當對方唔喺身邊或者冇揾自己，就會不停胡思亂想，繼而令自己越嚟越冇安全感。要明白即使係伴侶，每個人都係一個個體、有自己嘅時間。所有要識得享受獨處嘅時間呀！

Text by: Girlsmood

Photo from: Internet