今年復活節有四日長假期，雖然晚市仲未開放返，但係仍然有好多日間活動可以玩，等小編帶你去慢慢睇啦！

Marketoo x Cheeky Cheeky 中環街市復活節 Pop-up Store

復活節令人充滿喜悅，絕對係同朋友家人去感受熱鬧氣氛嘅節日。四月一連兩個週末，Marketoo 在中環街市一樓舉辦復活節期間限定店，集合近80間小店的手作產品。今次市集聯乘搞怪插畫角色 Cheeky Cheeky 厚面子，帶來得意又好玩的復活節慶典！場內設有 Cheeky Cheeky 打卡位及畫作，包括兩米高的 Cheeky 厚出奇吹氣公仔，仲有人型Cheeky厚出奇驚喜現身同大家見面。復活節當然唔少得獵蛋遊戲啦， 入場者會獲得一張厚出奇卡，只要尋找到厚出奇復活蛋，儲齊三個蓋印就可以獲得 A4 文件夾或口罩套一個。最適合一家大細帶埋毛孩去玩！

日期 : 2022年4月9-10 & 15-18日

時間: 1-8 pm

地點：中環街市1樓

地址：中環皇后大道中93號

中環街市為寵物友善商場，可手抱毛孩或放進寵物車進入Pop-up Store (中大型竉物須配戴口罩落地)

何淑美「游．遊」作品展

你有聽過蜂蠟畫作嗎？蜂蠟畫係指將加熱成液體狀態嘅蜂蠟（beeswax）同粉狀顏料混合形成有色熱蠟，再用有色熱蠟作畫。本地當代藝術家何淑美在海港城美術館舉行個人作品展「游・遊」，展出以蜂蠟創作的最新《夜遊》系列及《植物庭院》系列，一共超過35幅畫作，感受在大自然自處的樂趣。

首度於香港展出的《植物庭院》系列，靈感來自在花園實習園藝、在公園或叢林散步遛狗所看到的大自然景象，刻畫出四季變化的樹葉與花卉、動物神態等，從側面反映人們日常的情緒變化。

參觀展覽同時可以即場購買何淑美與天然香氣品牌聞香記合作推出的兩款《植物庭院》主題香氣噴霧，並選購限定精品包括明信片、文件夾、杯墊及鏡子，啱晒鍾意藝術嘅朋友。

日期 : 即日起至5月2日

地點：海港城美術館

地址：尖沙咀海港城海洋中心2樓207號

「日清Friday BUY & TRY」

合味道紀念館香港（紀念館）特意將廣受歡迎的「日清Friday BUY & TRY」再度升級，除了繼續推出全場食品至抵試食價，4月更悉心打造返校企劃，推出文具X美食組合，最平只需$35就可以擁有實用文具及食物！適逢復活節長假期，不妨來一趟激發創造力及好奇心的食品之旅! 參與紀念館三大工作坊，二人一組玩得開心又放心，在復課前盡情放電！

日期︰由 2022 年 4 月 1 日起每逢星期五擧行

尖沙咀廣東道33號中港城 2 樓 26-35 號舖

粉嶺流水響水塘 睇天空之鏡

流水響水塘位於新界東北八仙嶺郊野公園內，流水響湖面倒影藍天白雲，環境充滿仙氣，故有「天空之鏡」、「港版輕井澤」的稱號，最啱打卡！而且這條路線輕鬆易行，2小時就能行完新手都唔洗怕！如果想影到「天空之鏡」，就要早啲起身出發，上午8時至9時左右，光線柔和、湖面倒影會更清晰及漂亮。

流水響水塘建於二戰之後，為附近農地提供水源，時至今日流水響水塘已成為郊遊熱點，每逄假日都會看到不少遊人在湖邊野餐和拍照。流水響郊遊徑雖然後段需要爬坡，但途中有涼亭和燒烤場等休憩設施可以休息，絕對屬於新手可應付的路徑，仲可以趁住復活節親親大自然！

長度：4.4 公里

時間：2 小時

綜合難度：3

交通：粉嶺港鐵站乘坐52B小巴，於流水響道與鶴藪道的交匯處下車，沿流水響道步行至流水響水塘郊野公園入口。

離島一日遊 西貢橋咀島

平時去西貢通常都係玩水上活動，其實仲有另類地質活動好玩。西貢橋咀島位於西貢古火山口邊緣，平時成日聽人講去橋咀島浮潛，其實橋咀島地質景觀十分豐富，有難得一見的火山遺跡。橋咀島還有一條連島沙洲，隨著潮汐漲退而出現，如果想去睇呢個自然景觀記得要先查好每天的潮汐時間啦，否則潮漲就會被困在島上。 去完橋咀島仲可以到西貢市中心覓食，過一個chill Easter！

交通：西貢公眾碼頭有到橋咀島的渡船，價錢由$20至$40不等，船班次也比較浮動，每隔三十分鐘一班，下午5時30分為最後一班船。