相信睇過藍可兒閉路電視片段嘅大家對當年呢件轟動全球嘅案件唔會陌生。而由Netflix開拍嘅紀錄片《犯罪現場：賽西爾酒店失蹤事件》更加早喺上映前已經得到唔少討論，令人非常期待。但係上映之後反應就不如預期中好喇，以下就三個歸類網民睇完之後嘅負評～

1）內容都係大眾已知嘅資訊

唔少網民表示本來想透過呢套紀錄片得到更多資訊，例如一啲可能尚未公開的影像紀錄等，但發現內容都係講已知嘅資訊，甚至有網民表示用5分鐘睇維基百科都可以唔睇呢套紀錄片了。

2）重心放喺酒店背景

網民亦指紀錄片唔少篇幅係講述酒店嘅歷史、而非藍可兒事件本身。紀錄片講述酒店由建起到而家嘅轉變等等，網民認為都係不必要嘅內容。

3）太多唔關事嘅路人訪談

紀錄片中有唔少路人同Youtubers嘅訪問，令好多網民都表示內容拖泥帶水、加上以上所指重心並非藍可兒事件本身，令人覺得節奏好慢，更有網民表示覺得睇完覺得自己好似浪費時間咁。

雖然有以上嘅負評，但Netflix開拍呢件懸案嘅紀錄片成功令大眾重提當年討論度十足嘅案件、唔熟悉案情細節嘅亦的確可以透過呢套紀錄片更加了解呢件轟動全球嘅案件。

Text by : GirlsMood
Photo from：Netflix